Уг олимпиадад МУИС-ийг төлөөлөн МКС-ийн Програм хангамжийн тэнхимийн багш Г. Багаболд дасгалжуулагчтай оюутан Б. Хасан (ПХ-4), Э. Хонгор (ПХ-2), Л. Мөнх-Очир (ПХ-2) нарын бүрэлдэхүүнтэй баг оролцож, олон улсын програмчлалын олимпиадын анхны хүрэл медалийг эх орондоо авчирсан сайхан амжилт үзүүлэв.
Энэхүү баг нь “IT Zone” компьютерийн их дэлгүүр, Топика ХХК зэрэг байгууллагууд ивээн тэтгэснээр, 2009 оны 4-р сард МКС-ийн санаачлан зохион байгуулсан Монголын оюутны програмчлалын багийн анхдугаар олимпиадаас шалгарч, Азийн бүсийн олимпиадад оролцох эрх авсан байна. Тэд дөрвөн сарын турш олон улсын програмчлалын онлайн уралдааны сайтууд дээр тавигдсан 700 гаруй бодлогыг дасгалжуулагч багшийн удирдлаган дор бодож, бэлтгэлээ хангаснаар ийнхүү амжилт гаргажээ.
“АСM-ICPC” олимпиад нь их дээд сургуулиудын оюутны хооронд зохиогддог програмчлах ур чадвар, мэдлэг, дадлага, чадварыг шалгасан дэлхийн хамгийн нэр хүндтэй програмчлалын олон улсын тэмцээн юм.